Goalie mistake helep Arsenal enta final

Football | Naija

Note: this article is written in Pidgin English for a Nigerian audience

Add caption

FA Cup defending champion, Arsenal, play reach estra time bifor one kin mistake by Reading goalie, Adam Federici helep Arsenal win match 2-1, for FA Cup semifinal on Saturday.

Na Arsenal strika, Alexis Sanchez, score de second goal again, as fes haf of estra time just wan finish, to chook hand for Division Two club, Reading eye, but na Reading goalie, Federici, dash am sef, as hin allow de small shot comot for hin hand, roll enta net.

De tin pain Reading pieces, sake of say dem bin carri gree-die play dis match, as Garath McCleary ekwalise for dem, for second haf, afta Alexis Sanchez bin don score fes goal for Arsenal wen match reach 39 minit.

Arsenal bin dey play dia numba 28 semifinal for FA Cup, and dem dey wait to see who go join dem for final now, as Liverpool go face Aston Villa for de oda semifinal on Sunday. FA Cup final go hapun for May 30.

Bifor match start, many guymen bin tok say de match go too easy for Arsenal, but Reading carri difrent format come.

Na Arsenal see beta chance as match start sha, as dia defenda, Per Mertasacker fes nod ball wey Federici palm comot, bifor Mesut Ozil faya one coret freekick wey nack bar.

All join, as na dem fes score. Ozil troway one helele pass give Alexis Sanchez inside 18. Sanchez control am, dribbu one defenda, come faya shot pass Federici, enta net.

Dat goal no even reach 10 minit sef, as Reading carri red eye start second haf.

GOAL COMPUTER

Reading strika, Pavel Pogrebnyak carri ball reach line, come nasa small ball enta 18. McCleary faya de ball one kin, and de tin take style hite Arsenal goalie, Wojciech Szczesny, enta net. Even tho e bin be like say de goalie catch de ball, na computer wey dey refree watch, helep am sabi say de ball enta net, as ref blow wisu say na goal.

De tin come ginjah Reading anyhow, and dem for get penarity sef, afta Hal Robson-Kanu bin nasa ball wey nack Arsenal defenda, Mathieu Debuchy hand inside 18. Refree shun am.

De tin come opun Arsenal eye small, and dem for score goal as match wan finish, if to say Aaron Ramsey score ball afta hin don dribbu Reading goalie, see opun net. De guyman faya shot nack bar.

De match come enta estra time, but Reading playas don taya finish, bifor Sanchez cut enta 18, put ball for rite leg, faya one small shot wey Federici allow pass hin toros, enta net.

De tin pain de goalie sotay, he start to cry anyhow, wen refree blow wisu say match don finish, as Arsenal playas start to jollificate ontop fild.