Barcelona go ge
t de chance to avenge de bad thing wey Bayern Munich do dem lass 2 years for de Uefa Champions League as de two of dem go jam diasef again for dis year semifinal.
Na on Friday na hin de Oga dem for Uefa sit down do de draws for dia office, and Real Madrid wey na for dia hand na hin de trophy dey go jam Juventus wey be Baba for Italy.
Unna go rememba how Bayern Munich take waya Barcelona 7-0 lass 2 years bifor Bayern kon bilala Borussia Dortmund for de final wey helep Bayern carry dia 5th trophy for Europe.
One time coachi for Barcelona, Pep Gurdiola na hin dey run things now for Bayern Munich, and de padi go wan take swagga enta Nou Camp for de fess time since hin don kommot.
Na Barcelona go dey dia house for de fess leg match, and Barca muss rememba wetin Bayern do Porto for Munich bifor dem go play dia fess match.
Real Madrid for dia own side go enta Italy for dia fess match, bifor Juventus go kon meet dem for Spain for de second leg match.
Dis na de second time since de year 2003 wey Juventus go enta semifinal, as unna go rememba say na AC Milan hama dem for de final dat time.
Juventus juss dey fly like arik airline for Italy as na dem get mouth to carry de Serie A torphy and dem don reach de final for de Italo cup sef.
Meanwilly, na May 5/6 and 12/13 na hin de semifinal match go shelle, and na for Berlin na hin dem go play de final on June 6.
Barcelona v Bayern Munich
Juventus v Real Madrid
No comments:
Post a Comment