Barca dey go Final

Barcelona don grab dia place for de Champions League final for Tuesday, afta dem don beat Bayern Munich 5-3 for aggregate for dia semifinal no matta dia 3-2 loss for Tuesday nite to de Germans for de Allianz Arena. Pep Guardiola's Bayern side bin dey face sontin wey dey like mountain dem no fit climb afta dem don suffa 3-kondo defeat for lass week fess leg for Camp Nou, but dem kon get early hope for de return leg wen Medhi Benatia wey no body dey mark carry head wire goal for de seventh minite.
But as things kon be, de final result for de match kon show face wen Luis Suarez don set up Neymar two times to wire goal for de visitors bifor dem don play haf hour.
Bayern bin show plenty swagger for de secon-haf and goals wey come from Robert Lewandowski and Thomas Mueller allow dem to win de game for de nite, but Barcelona kon enta for de final wey go shele for Berlin for June 6.
Luis Enrique's side go face either strong face rivals Real Madrid or Juventus for de final as de Italians go defend dia 2-1 fess-leg lead for de return leg for Santiago Bernabeu for Wednesday.